Origins Face Masks Review || ريڤيو ماسكات اورجنز للوجه

السلام عليكم

اورجنز من ماركات العناية بالبشرة اللي جديدة عليا

الصيف اللي راح قررت اجرب ماسكاتهم فأخذت كل اللي شفتهم قدامي

اتوقع فيه ٢ ما اشتريتهم لانهم كانو اوت اوف ستوك

بوست اليوم حتكلم فيه عن رأيي فيهم بالتفصيل

جربت ٤ انواع من ماسكات الوجه عندهم 

Origins Clear Improvement Active Charcoal Mask

ماسك الفحم النشط لتنقية و تنظيم المسام

من مكوناته فحم البامبو و الطين الأبيض الصيني 

يستهدف المسامات المسدودة و ينظفها بعمق 

هذا الماسك من اكثر الماسكات اللي فعلا بشرتي فرقت عليه

لأفضل النتائج انصح انك تسوي حمام بخار او تجيبي فوطة مبللة بموية دافية

و تمسحي فيها على وجهك عشان تتفح المسام و يشتغل الماسك بشكل افضل

احلى شي استخدمه نهاية كل اسبوع المسامات تكون مسدودة من الميك اب 

ينظف البشرة بشكل خيالي تعرفو شعور لما الخشم و التي زون تلمع لمعة النظافة؟

يعطي نفس النتيجة من اول استخدام

انا ما اعاني من مسامات واضحة مرة فما لاحظت فرق في الحجم 

لكن كنظافة و ملمس البشرة مرة لاحظت فرق 

 يناسب : جميع أنواع البشرة المعرضة للمسام

Origins GinZing Refreshing Face Mask

ماسك منعش يوقظ البشرة المرهقة

من مكوناته حبوب القهوة و الخيار و نوع من انواع المشروم

طريقته انك تحطيه على البشرة لمدة ١٠ دقايق و بعدين تمسحيه بمنديل ما تغسليه

حبوب القهوة تنشط البشرة و الخيار ينعش اما المشروم فيهدي البشرة

جربته كذا مرة عشان اعطيه فرصة صراحة ما عجبني 

ما حسيت سوالي اي شي غير اني حطيت شي يلصق على وجهي

بعد ما تمر ال ١٠ دقايق يختفي شعور التلصيق و ما يحتاج حتى اني امسحه

ما انصح فيه ابدا

Origins Out of Trouble 10 Minute Mask 

ماسك البشرات المعرضة للحبوب 

من مكوناته اكسيد الزنك، الكبريت، و الكافور 

يستهدف البشرات اللي فجأة تطلعلها حبوب 

استخدمه بطريقتين 

الطريقة الأولى: كماسك على كامل الوجه لمدة ١٠ دقايق، ينشفلي الدهون من البشرة

 و ينظفها بعمق لكن لو كان عندي حبة ما يوديها في ١٠ دقايق طبعا

الطريقة الثانية: انك تستخدميه كتريتمنت ليلي على مكان الحبة و تخليه ينشف

اول ليلة حتحسي الحبة بدأت تصغر، ثلاث ليالي و الحبة ما يصيرلها اثر

مرة عجبني بالطريقة هذه اكثر ما صرت استخدمه كثير لانه حاليا بشرتي مافيها مشاكل الحمدلله 

عشان خلصت كورس الروكتان

لكن في حال طلعلتلي الحبة الشهرية المستفزة اقدر استخدمه لسا و استفيد منه بهالطريقة

يناسب: البشرات الدهنية و المختلطة المعرضة للحبوب

Origins Drink Up Intensive Overnight Mask

الماسك الليلي المركز 

من مكوناته الأڤوكادو و زيت بذرور المشمش و الطحالب البحرية

يستخدم قبل النوم تحطي كمية منه و تدهنيه زي اي ماسك لكن االفرق انك لازم تنامي فيه

يرطب البشرة بعمق و يجدد سطح البشرة 

و يساعد في تجنب الجفاف في المستقبل و علامات تقدم السن في البشرات الشابة

جدا جدا جميل هذا الماسك بشرتي مختلطة و جدا جدا عجبني مرة يرطب

اصحى من النوم بشرتي ناعمة و مترطبة و نضرة كاني شاربة ٣ لتر موية

استخدمه مرة الى مرتين في الاسبوع خصوصا اذا بحط ميك اب اليوم اللي بعده

يساعدني في انه يطلع الميك اب شكله احلى لما ينحط على بشرة مترطبة كويس

اتوقع مافي وحدة تجربه ماراح يعجبها بالذات البشرات الجافة

يناسب: البشرات المختلطة و العادية و الجافة

من بين الماسكات الاربعة اللي احس يستحق ارجع اشتريه 

هو ماسك الفحم و الماسك الليلي مرة ناسبوني و حبيتهم 

اوريجنز للاسف غير متوفر في الشرق الاوسط

موجود اونلاين و انا عن نفسي اخذتهم من لندن

سعر الماسك الواحد: 23 باوند يعني تقريبا 125 ريال