فرش المكياج المفضلة عندي و أهم الفرش للمبتدئات || My Favorite Makeup Brushes

السلام عليكم بنات

بوست اليوم ما تعرفو قد ايش من زمان نفسي اكتب عنه

لما بدأت احب الميك اب ما كنت عارفة ايش الفرش اللي لازم اشتريها او احتاجها

فأول خيار كان عندي هوا مجموعة الفرش زي حق سيجما مثلا 

و حقيقي اكتشفت اني ما استفدت من اغلب الفرش شي 

نصيحتي لكل مبتدأة لا تحصري نفسك بمجموعة فرش عشان يسهل عليك الموضوع 

 الا مثلا مجموعة الوجه الذهبية من ريل تكنيك هذه منجد مرة انصح فيها 

انصحك انك تبدأي تجمعي فرشة فرشة بالتدريج لين ما تكونيلك الفرش الأساسية بالنسبة لاحتياجك انتي

ابدأي حبة حبة و صدقيني مافي اهم من الفرش الكويسة حتغيرلك مكياجك ١٨٠ درجة

و ما أقصد بالفرش الكويسة الفرش الغالية بس مثلا لأنه سيجما و ريل تكنيك مثلا ممتازين و سعرهم في متناول الجميع

قبل ما أبدا بذكرلكم اهم ماركات الفرش المفضلة عندي 

اولهم ماك حقيقي مافي زيهم لفرش العين و الوجه بدون استثناء كل فرشهم ممتازة

لفرش الوجه احب فرش ريل تكنيك اكثر شي سعرها مناسب جدا و انصحك تطلبيها اونلاين بنفسك تطلع ارخص

و بعدهم طبعا سيجما من عندهم انصحك اكثر شي بفرش الوجه و بعض من فرش العين 

من الماركات اللي ما اشوف احد يتكلم عنها كثير هيا سيفورا طبعا اقصد خط فرش البرو لأنه عندهم نوعين

فرشهم ممتازة و اسعارهم قريبة من اسعار فرش ماك و الحلو فيهم انه ما يحتاج حتى تطلبيهم اونلاين

طيب عشان ما أطول عليكم زيادة خلينا نبدأ

قسمت الفرش حسب استخدامهم و في كل قسم حطيت اكثر من خيار 

عشان كل وحدة تشوف ايش اللي يسنابها

Foundation || فرش الفاونديشن

Beauty Blender

أحلى اسفنجة في العالم و تفيدك مرة كثير مو بس في الفاونديشن حقيقي اختراع مرة خرافي

تدمج الفاونديشن على الوجه بشكل سهل و سلس و تعطي فنش طبيعي فعلا تعطي لووك خالي من العيوب

 …. ، تقدري تستخدميها للفاونديشن ، الكونسيلر ، الكونتور الكريمي ، البيكنغ ، الباودر فاونديشن 

الشي الوحيد اللي ما أقدر اعيش بدونه و أحس اي بنت لازم يكون عندها هيا 

كثير بنات أشوفهم يستخدموها جافة و هذا غلط هيا تستخدم مبللة

فتحطيها تحت الموية لين يكبر حجمها و بعدين تعصري الموية الزايدة

موجودة في سيفورا

Real Techniques Buffing Brush

هذي الفرشة جدا جميلة للفاونديشن و احبها للتنتد مويسترايزر كمان

زي مو باين في الصورة هيا تجي شبه مسطحة و شعرها كثير و قريب من بعض

تدمج الفاونديشن بسهولة و خفة و تعطي تغطية متوسطة  

تجي مع مجموعة فرش الوجه من ريل تكنيك

Concealer || فرش الكونسيلر

Sigma F70 Concealer Brush
فرشة كونسيلر شعرها صناعي و مسطحة
بيرفكت للكونسيلر لأنه حجمها مناسب مو صغيرة ولا كبيرة
تنفع لتغطية العيوب

Real Techniques Fine Liner Brush
فرشة حجمها صغير مرة و شعرها صناعي
حجمها مرة بيرفكت لتنظيف تحت الحواجب بالكونسيلر
او ممكن تستخدميها كمان اذا كنتي حاطة روج احمر او غامق و تبغي شكله نظيف
فتحطي شويا كونسيلر من الاطراف

Micro Beauty Blender
هذه المايكرو بيوتي بلندر ماهي ضرورية ابدا
لكن فيها ميزة غير عن العادية انها توصل لاصعب و اضيق المكان
دقيقة مرة فتقدري تدمجي فيها كونسيلر تحت العين و يعطي تغطية اعلى
و تنفع لتحت الحواجب مرة اللي تهمها الدقة حتناسبها
بالنسبة ليا احبها بس ما اشوف انها مهمة او ماقدر استغني عنها

Powder || فرش الباودر 

Sephora Pro Buffing Brush #62

الفرشة هذه احب استخدمها لما احط باودر فاونديشن 

تعطيني تغطية مرة عالية و لأنها مسطحة تدمجلي الباودر في نفس الوقت

احبها لما اكون مستعجلة و ما عندي وقت احط فاونديشن سائل

Real Techniques Powder Brush 

أحلى فرشة باودر عندي شعرها صناعي 

و شعراتها ناعمة مرة مرة ناعمة

 أثبت فيها الفاونديشن سواء بلووس باودر او باودر مضغوطة

تثبت الفاونديشن بدون ما تزيد تغطيته 

Highlight and Contour  || فرش الهايلايت و الكونتور 

نبدأ اول شي بالكونتور 

Mac 130 Short Duo Fiber Brush

فرشة ديو فايبر قصيرة شعراتها قريبة من بعض و متماسكة

أحبها مرة لدمج الكونتور الكريمي لأنها ما تحرك الكونتور و تخليه في كل مكان

بمجرد حركات دائرية بسيطة تدمجه في نفس مكانه بسهولة

Nars Ita Kabuki Brush

بدون اي مبالغة هذه احسن و افضل فرشة لكونتور الباودر

زي ما تشوفو شكلها شعرها طبيعي و مسطحة و شعراتها مو مرة قراب من بعض 

مرة حلوة لأنها تعطي كونتور نظيف و حاد و في نفس الوقت شعراتها تدمجلك الكونتور

تنفع لكونتور الخشم كمان ماهي كبيرة باختصار مرة ممتازة 

Sephora Pro Fan Brush #65

احبها مرة للهايلات الباودر توزعه بخفة

احب استخدمها اذا ابغى الهايلايت حقي خفيف بس تعطي قلو و تشيل القلتر الزايد 

Real Techniques Setting Brush 

تشبه الفرشة اللي حتكلم عنها بعد هذه  

و اقدر اقولكم انها بديل لها

حجمها صغير و شعرها صناعي تنفع للهايلايت و لتثبيت تحت العين

Sigma F35 Tapered Highlighter Brush

اذا ابغى الهايلايتر حقي قوي و واضح استخدم هذي الفرشة

شكلها بيضاوي و صغيرة مرة احبها 

تنفع كمان لتثبيت تحت العين مرة حجمها بيرفكت

Blush and Bronzer || فرش البلشر و البرونزر

الفرشتين ينفعو للبلشر او للبرونزر بس حقولكم كل وحدة احبها لايش

Sigma F10 Powder/Blusher Brush

فرشة استخدمها للبلشر حجمها مو صغير ولا كبير 

و انا احب البلشر يكون في مكان محدد مو في كل الوجه

تلقط اللون مرة كويس و ما يحتاج تعيدي اكثر من مرة

Mac 168 Large Angled Contour Brush

من احلى الفرش عندي شعرها طبيعي 

و ناعمة مرة و شوفو شكلها جاية مايلة بزاوية

مرة احبها للبرونزر تدمجه بسرعة و سهولة

بعض الاحيان استخدمها للبلشر كمان

Eye Brushes || فرش العين

أحس هذه ال ٨ فرش كلها مهمة و بنفس الأهمية 

و اذا كانو عندك مستحيل تحتاجي غيرهم

عشان تقدري تطبقي اي ميك اب لووك يخطر في بالك من سموكي الى كت كريس الى لووك طبيعي

Mac 239 Eye Shader Brush

فرشة شادو مسطحة تستخدم لوضع اللون في الجفن مرة حلوة و تمسك اللون كويس

 و تطلع لون الايشادو قوي و واضح مرة احبها و عندي منها اثنين

Mac 217 Blending Brush

افضل فرشة دمج قد جربتها في حياتي هيا هذي الفرشة تحط اللون و تدمجه في نفس الوقت بسهولة

تقدري تستخدميها نظيفة و تدمجي فيها كل العين

و تقدري تحطي بيها اي شادو على كسرة العين و تدمجيه في نفس الوقت

لو انصحكم بفرشة وحدة للعين من ماك اكيد حتكون هذه برأيي مرة مرة مهمة

Sigma E45 Small Tapered Blending Brush

هذي فرشة مرة دقيقة و لها كذا استخدام

اول شي اللي تحب الكسرة تكون محددة او لووك الكت كريس 

هذه الفرشة بيرفكت لهذا الشي تحط اللون بشكل محدد و تدمجه بشكل مرة خفيف

كمان تقدري تستخدميها لاضاءة مدمع العين و اللي تحب تحط تحت الحواجب

Mac 224 Tapered Blending Brush

فرشة دمج فلفي و منفوشة

انا ما اسوي اي لووك للعين بدون ما اوزع لون انتقالي قبل و هذه الفرشة ممتازة لهذا الشي 

احب استخدمها كمان بعد ما اخلص عيني اجيب وحدة نظيفة و ادمج بيها كل العين

Sigma E30 Pencil Brush

من اهم اهم الفرش عندي هيا البنسل فرش 

لأني مستحيل احط اي شادو بدون ما احط لتحت العين

و استخدمها عشان تعطيني سموكد افكت تحت العين

Sigma E20S Short Shader Brush

smuged look حلوة هذه الفرشة اذا ابغى 

لاني بعض المرات احب احط اي شادو و يكون مموه فوق و تحت العين

مرة دقيقة في حط اللون و في نفس الوقت تموهه

Mac 263 Small Angle Brush

احلى فرشة للحواجب عندي صغيرة و نحيفة مرة 

تاخذ اللون مرة كويس و سهل تتحكمي فيها و تحددي فيها لو تحبي

Sephora Pro Bent Liner Brush

اذا انتي تحبي الجل لاينر هذه الفرشة احسن فرشة جربتها

نحيفة مرة و دقيقة و زي ما انتو شايفين جاية معكوفة

فمرة تسهلك رسم خط ايلاينر بيرفكت

The Multi Task Brushes  || فرش متعددة الاستخدامات 

هذه الفرش اول شي جا في بالي لما قررت اكتب عن الفرش 

بس فعليا مرة احترت فين اقدر اصنفهم لانه كل ما اغسلهم استخدمهم استخدام ثاني

Sigma F25 Tapered Face Brush

من الفرش اللي مرة مرة احبها 

تنفع للباودر تنفع للبرونزر و البلشر و حتى لو تبي تدمجي الكونتور 

مرة حلو لانه شكلها جاي كانها بيضة و ناعمة 

Real Techniques Multi Task Brush

من اسمها باين انها مالها استخدام محدد

في البداية ما كنت استخدم غيرها للبرونزر 

بعدين بدات احبها للبلشر و كمان جربتها للباودر كانت مرة ممتازة

Sigma F55 Small Duo Fiber

اكثر من مرة ذكرت في انستقرامي قد ايش احب فرش الديو فايبر 

لانها حقيقي احسن شي للمنتجات الكريمية

هذي حجمها صغيرة و شعراتها طوال فتنفع للفاونديشن

للبلشر الباودر و الكريمي و لدمج الكونتور الكريمي

بس اذا تبغو تستخدموها للفاونديشن انصح انه ترجعو بعدها ببيوتي بلندر

 عشان تتاكدو انه مافي اي خطوط 

هذا كان كل شي ان شاء الله انكم تكونو استفدتو 

و الموضوع ساعدكم تحددو اولياتكم في الفرش اللي تحتاجوها

شكرا