اهلا
بوست اليوم حيكون عن طريقتي في ازالة الميك اب سواء كان خفيف او ثقيل
اذا سويتي زي طريقتي اضمنلك وجهك يصير نظيف ١٠٠٪ بدون ولا نقطة ميك اب
1. Clinique Take The Day Off Cleansing Oil
من يوم ما جربت هذا المزيل و انا ما امسح الميك اب الا فيه ٫ جدا ممتاز
هوا عبارة عن مزيل زيتي من كلينيك اخذ منه ضغطة اذا الميك اب خفيف
و ضغطتين الى ثلاثة اذا الميك اب ثقيل و بس اسوي مساج بالزيت على وجهي و هوا ناشف
لين ما يسيح كل الميك اب و الماسكارا بعدها اغسل وجهي بالموية و يكون رغوة و يشيل اغلب الميك اب
تلاقوه في وجوه او ديبنهامز
2. Clarisonic Mia 2 + Ceteaphil Oily Skin Cleanser
احب اغسل وجهي بغسولي العادي بعد زيت كلينيك
لما اكون حاطة ميك اب خفيف اكتفي بغسولي من سيتافيل
اما لو حاطة ميك اب ثقيل فاستخدم حبيبتي الكلاريسونيك معاه
غسول سيتافيل مرة ناسبني اول شي لأنه طبي ٫ خفيف و لطيف
ينظف الوجه بدون ما يجففه ٫ و يعيد توازن البشرة
جهاز الكلاريسونيك هوا الشي الوحيد اللي كل ما استخدمه و اكون حاسة انه وجهي نظيف
الا ما يطلع بقايا ميك اب معاه ٫ تنظيفها ٦ مرات اقوى من التنظيف باليد
حقيقي تنظف بعمق حتى جوا المسام ٫ بعد ما استخدمها احس وجهي منجد يتنفس
حقيقي انعم فرشة من عندهم Radiance Head الفرشة اللي احبها اسمها
انعم من فرشة البشرة الحساسة حتى و في نفس الوقت تنظف زيها زي اي فرشة ثانية
سيتافيل موجود في الصيدليات اما كلاريسونيك فموجودة في سيفورا
3. Bioderma Sensibio H2O
هذي الخطوة مو ضرورية مرة صراحة لانه اذا طبقتو الخطوات اللي فوق حينشال كل الميك اب
بس احب احط شوية بيوديرما في قطنة و امررها على وجهي بالذات عند منابت الشعر
دايما الاقي فيها بقايا قاونديشن
بيوديرما البنك احلى مزيل مائي جربته انا جدا اثق بالشركات الطبية لبشرتي
مرة لطيف و يناسب كل أنواع البشرة حتى الحساسة
ما يجفف البشرة و طبعا موجود في اغلب الصيدليات
بهذه ال ٣ خطوات انا احب امسح الميك اب و احس وجهي منجد نظيف بعدها
و بعدها تكملو روتينكم العادي من سيروم و مرطب و تكونو خلصتو
و اللي يقول الميك اب هوا اللي يخرب البشرة لو نظفتو وجهكم كويس مستحيل يخرب البشرة
مو تمسحوه بمناديل مكياج بس و تقولو خرب وجهي
و دايما دايما انتبهو لمدة صلاحية الميك اب بالذات الأشياء الكريمية زي الفاونديشن
اتمنى تكونو استفدتو من هذا البوست
شكرا
No comments:
Post a Comment