Brand Focus: Sleek || ريفيو ماركة سليك

اهلا يا جميلات

 اليوم حكمل سلسلة التركيز على ماركة و حتكلم عن ماركة سليك البريطانية 
من ماركات الدرق ستور المفضلة عندي جودتها ممتازة مرة و سعرها احلى

حعملكم ريفيو عن كل المنتجات اللي جربتها و سعرها و فين تلاقوها

 و اخيرا الاشياء المست هاف بالنسبة ليا

يلا نبدأ

Sleek Blush By 3
عبارة عن باليت مكون من ٣ بلشرات و سعرها ٥٨ ريال تقريبا
 البلشرات حقتهم مرة بقمنتد و قوية و نقطة منهم تكفي و جدا سهلة بالدمج



اول لون عندي اسمه
Lace
 اول لون من اليمين اورانج فاقع مطفي
 ثاني لون روز قولد مع اورانج بس فيه لمعة
اخر لون اورانج فاتح

الوان الباليت على الوجه مرة حلوة حطو مرة مرة قليل و ادمجوها كويس
مرة تناسب الوان بشرات كثير و تنور الوجه و مرة حلوة للصيف

ثاني لون عندي
Sugar
اول لون من اليمين مشمشي محروق مطفي
و ثاني لون بنك غامق مع شمر ذهبي
و ثالث لون بنك غامق على احمر مطفي

احب اللونين اللي من اليمين مرة بالذات اول واحد مرة حلو للاستخدام اليومي
اما اخر واحد ما استخدمته كثير لانه غامق عليا اتوقع على السمر مرة حيناسبهم
الباليت تناسب تقريبا القمحية الى السمرا



I-Divine Palette
باليت مكون من ١٢ لون اي شادو عندهم ١٨ باليت مختلف انا عندي ٤ منهم
و كل فترة ينزلو باليت ليميتد
سعرهم ٤٧ ريال تقريبا

Storm
زي ما انتو شايفين الوانه متنوعة بين المات و الشمر و البنيات لدرجات السموكي
اكثر واحد حبيته
 الايشادوز الشمر مرة حلوة كانها زبدة و مرة بقمنتد و المطفية جيدة

Au Naturel
هذا باليت الالوان الطبيعية عندهم
نفس الشي الالوان مات و شمر
ما استخدمه كثير لسببين
١- ينقصه الوان متوسطة كثير لانو الوانه يا فاتحة يا غامقة
٢- الالوان الفاتحة المات ما تبين على بشرتي 

Ultra mattes V2
الوانه كلها مطفية
 هنا الالوان قوية و بقمنتد حتى الفاتحين
حبيته مرة

Ultra Mattes V1
 هذا الباليت اشتريته عشان العب فيه صراحة
انا مو من محبين الالوان هذي ابدا بس متاكدة اللي تحب الالوان حتعشقه
الوانه كلها مات 

(عموما الايشادوز حقتهم الشمر ممتازة بس المات مو مرة ، تتناثر و بعضها (مو كلها) مو بقمنتد مرة و صعبة في الدمج)



Poutpolish in Plum
 مرطب للشفايف يعطي لون خفيف للشفايف و يرطبها
عندهم ١٣ درجة و سعرها ٣٠ ريال

من مكوناته زيت اللوز و زبدة الشيا و فيتامين إي
 و فيه نسبة حماية
 SPF15
الدرجة اللي عندها لونها عودي و على الشفايف تبين افتح بكثير
حلوة لكل يوم و عجبتني ريحته



Sleek Contour Kit in Medium
علبة يجي فيها باودر للكونتور و الهايلايت
عندهم ٣ درجات لايت و ميديم و دارك على حسب لونك
سعرها ٤٠ ريال تقريبا

درجة الكونتور بالنسبة ليا بيرفكت و هيا اللي استخدمها دايما و مرة حلو الملمس حقها و سهلة في الدمج كمان
و هذا شي مهم في الباودر كونتور
الهايلايت كمان حلو بس ما اعطيته حقه في الاستخدام



Sleek Blush in Sahara
بلشراتهم المفردة في منها ١١ لون
سعره ٣٨ ريال

 اتكلمت عن هذا البلشر من قبل في الانستقرام
لونه برتقالي محروق ماعرف كيف اوصفه بس اللون مرة طبيعي على الوجه
يناسب اي لووك صباح او ليل
و مطفي مافيه لمعة ثباته بالنسبة ليا كويس مرة
يناسب السمر اكثر لانه غامق بس حتى لو انتي بيضة تقدري تستخدميه بخفة



Brow Kit in Dark
باليت للحواجب فيه جل و بودرة و يجي معاه فرشتين صغار و ملقاط
سعره ٥٠ ريال تقريبا
فيه منها ٤ درجات

طريقتي في استخدامه : احط الجل على نهاية الحاجب بس و بالباودر اعبي باقي الحاجب

لونه بيرفكت انا شعري كان مصبوغ بني و دحين رجعته لونه الاصلي و مناسبني

الفرش اللي معاه جربتها مرة مرتين بس و ما استخدمتها كثير بس جيدة اذا ما عندك فرش

انا استخدم فرشة من ماك للباودر و من سيجما للجل

Bronze Block in Dark

برونزر يجي فيه ٣ درجات برونزر و بلشر

فيه لايت و دارك انا اخذت الدارك 

سعره ٤٥ ريال تقريبا

البرونزر هذا مرة يشبه حق جيرلان نسخة منه

حق قيرلان ب ٣٠٠ وشي و هذا باقل من ٤٥ شايفين الفرق؟
عجبني لونه بس ما عجبتني الفكرة يعني كويس ما ضيعت ٣٠٠ ريال على جيرلان 
ما احب احط برونزر مع بلشر على كل وجهي
استخدم الاثنين اللي فوق لحالهم كبرونزر 
او اخذهم ال ٤ بالفرشة و احطه كبلشر 

ثباته عالي و مرة لونهم قوي و سهلين بالدمج

:الاشياء اللي انصحكم تجربوها
البلشرات
الكونتور كت
مرطب الشفايف الملون
باليت الحواجب


:اماكن وجودها
كل اغراضي اخذتها لما اروح لندن من بووتس او سوبر درق و عندهم موقع اونلاين
sleekmakeup
و اللي ما تعرف تطلب متوفرة عند التاجرات بس اكيد مو نفس الاسعار اللي ذكرتها

هذا كان كل شي لليوم اتمنى عجبكم البوست و شكرا